بقلم: د بسمه إبراهيم
امبارح كنت في كشف عادي المفروض ابلغ الدكتور فيه إن الرنين بالصبغه اللي كان طالبه اترفض عشان في قطعة معدن في جسمي
مكملتش كلامي لقيته بيكتب :
“مسح ذري عاجل”
وقال للممرضة:
عااااجل… بلغيهم في أقرب وقت ممكن حتى لو مفيش مواعيد قريب قوليلهم
خرجت من العياده أدور على المصلى
كانت اطول صلاة عصر صليتها في حياتي
بحاول أركز … وبحااول أهدى …
بس الأفكار كانت شغالة مابتسكتش:
هتعيدي ده تاني؟
طب وهتطلعي منها المره دي بقا؟
طب هتلحقي تكملي محتوى رمضان اللي انتي متحمساله؟
طب والباكدجات المحجوزه لو حصل حاجه هتلحقي تكمليها؟
طب والولاد؟
سيل من الافكار الكتير وكلهم ملهمش علاقه ببعض
في آخر سجدة… بكيت … بصوت واطي جدا
بعد السلام
البنت اللي جنبي حضنتني وقالتلي:
«دعيتلك» فبكيت اكتر بقا
خرجت من المصلى
لقيت بنتين واقفين مستنيني:
واحدة ادتني بسكوتاية وحضنتني ومشيت
والتانية بنت جميله في الكافتيريا قربت وحضنتني وقالتلي:
“تعالي انزلي معايا الكافتيريا هعملك حاجه تشربيها”
واحدة تانية ادتلي مناديل .. وفجاه لقيت بنات كتير بيحضنوني ويدعولي ومعرفش ولا واحده فيهم
ساعتها حسيت إني عايزة أقولهم:
إنتوا طلعتوا منين؟
أنا كنت لوحدي من خمس دقايق
وفجأة…
جالي فلاش باك
لكل فترة علاجي وكل اللي حصل في الرحلة
مواقف شبه دي كانت مليئه بلطف ربنا اللي سبق خوفي
دعاوي من ناس اعرفهم ومعرفهمش كل يوم الصبح من قدام الكعبه
رسائل من ناس بيطموني على حالتي الصحيه طول الوقت
تيسير في عز الضيق
ساعتها فهمت حاجة مهمة اوي:
أكتر حاجة الإنسان ممكن يبتلى بيها
مش الابتلاء نفسه … لكن النسيان
نسيان اللطف اللي ربنا بيبعته طول الوقت
نسيان التدابير و العنايه الالهيه اللي بتتجلى في كل المواقف
نسيان ان ربنا بيتكفل بيك ومش بيسيبك لوحدك ابدا
وعشان منساش … اتعودت اكتب
طول الرحله كنت عامله نوتة مخصوص
اسمها «فلا تنسى»
كل مرة ربنا بيلطف بيا فيها …أكتب
ولما تحط ان الشيطان هيلاعبني بفتح واقرا وفي كل مره بنبهر كاني بقرا قصة حد تاني مش حاجه حصلت معايا انا فعلا .. عشان احنا فعلا بننسى
واستحضرت وقتها الجملة اللي كانت بترن في ودني دايما:
«ليغلبن لطفه خوفي»
مهم جدا تعرفي ان مهما بلغت درجة وعيك ومرونتك وصلابتك النفسيه
في لحظات لازم تتعرضي للوساوس
الشيطان طبعا مابيصدق لان هنا شغله بيبدء
الوعي مش بيمنع وساوس الشيطان ولا الافكار السلبيه
بس بيخليكي تقدري تديريها وتخرجي منها اسرع قبل ما تسوقك ولا توقف حياتك بعدها
اترك تعليقاً