جمال المنياوي
عقدت جلسة عرفية بطحا الأعمدة بمركز المنيا لإنهاء أزمة فيديو صلاة الشباب الستة
حيث قدمت مطرانية سمالوط اعتذارا رسميا عن مقطع الفيديو الخاص بأزمة فيديو صلاة الشباب الستة .
على الجانب الأخر وجه شريف رسمى رسالةإلى كل شاب قبطي في مصر فحواها كالاتى
المرحلة اللي احنا عايشينها حاليا مش محتاجة خناقات ولا استفزاز ولا معارك دينية علي السوشيال ميديا ..
احنا في حالة احتقان شديدة جدا و اي كلمة ممكن تتفهم غلط و اي فيديو ممكن يتحول لقضية و اي هزار ممكن
يتحول لفتنة علشان كده خلينا اذكي من اللحظة .. متدخلش في سجالات دينية حساسة تخص الحجاب او النقاب
او الاذان او الصلاة او المساجد او الشريعة او التراث الاسلامي ولا تدخل في جدال عن القرآن او الاحاديث
او الصحابة او اي رمز ديني
و متدخلش في معارك المقارنات بين الاديان ولا في خناقات مع مسلم او ملحد لمجرد انه بيقول رأي استفزازي ..
مش كل حاجة تستحق رد ومش كل استفزاز يستحق معركة ولو شفت شخص مسلم علماني بينتقد تراثه فده
شأنه وهو مسئول عن كلامه و كذلك الملحد اللي من خلفية اسلامية مسئول عن آرائه وانت مش مطالب
تكون طرف في كل نقاش و متعيدش نشر اي محتوي ممكن يتفهم منه سخرية من عقيدة او شعيرة دينية لمجرد
انك شايفه هزار او لان غيرك عمله ١٠٠ مرة و لا تتابع قنوات او صفحات مثيرة
لان تواجدك عندهم هو اللي اعطاهم قبلة الحياة و الاستمرار .. لو انت مش موجود عندهم كانوا قفلوا من زمان لانهم بياكلوا عيش علي قفاكم
احنا مش بنقول الكلام ده خوف من حد ولا تراجع عن حقنا في التعبير لكن لان الحكمة احيانا تكون في اختيار
المعركة و توقيت الكلام .. احمي نفسك واحمي بيتك و ماتديش فرصة لحد يصطاد كلمة منك و يحطك في معركة
انت في غني عنها و مش محتاجها .. احترامك لدين غيرك لا يعني انك ضعيف و حرصك علي مشاعر الناس لا يعني انك تنازلت عن حقك ولا يخليك تسأل و هم مش بيراعوا مشاعري ليه؟ ولا اللي بيغلط مش بيتحاسب ليه؟
لان لكل شئ تحت السماء وقت .. مصر محتاجة في الوقت ده عقل اكتر من الصوت و حكمة اكتر من الغضب ..
دي مش دعوة للخوف لكن دي دعوة للحكمة .
اترك تعليقاً