جمال المنياوي
منقول لأ..مش تعليقات أهل ليبيا اللي فعلاً أخجلونا بكلامهم الطيب عن بلدنا..المفرح إننا بنكتشف لأول مرة بالصوت والصورة إن عمق مصر مش في الخليج..لأ..في الليبي الذي لم يساومك على شيء، وقدر النسب والجيرة وفتح لك آبار البترول..في القطاع اللي رغم الألم لسه شايل علم مصر في شوارعه، مع إن كان له حق كبير لو زعل مننا..في السودان اللي ساعدتنا أيام الجنرال عبود إننا ناخد 55.5 مليار متر مكعب من مياه النيل، واللي كانت أول دولة يتعمل فيها مؤتمر عربي بعد النكسة ونسمع منها كلمة اللاءات الثلاث..
احنا مش الخليج ولا هنكون..جايز البعض اتسحر بالمعمار الخليجي التافه بتاع ناطحات السحاب..أو اتشد لفكرة الثراء السريع والعربيات الشيك والأجور اللي تلوح أكبر رأس..لكن في أول وقت للاختبار..المصري عرف يقف مع مين..لقى نفسه لسه زي ما هو..بيكره الكيان وأمريكا..ومعرفش يكون طبال، وحتى لما خرج كام مصري يوطي رأسه للخلايجة، المصريين أكلوه أكل..ولا نفس طلع لهم بعد كده..الخليج عايزك عبد مؤجل..يؤجر ضميرك وبندقيتك ويشغلك عنده باليومية..وخدوا أكبر مقلب في عمرهم مع حرب إيران، لما تأكدوا إننا فعلا شايفينهم زكايب فلوس، ولا يمكن ننصرهم على دولة عريقة تدافع عن حقها في الوجود زي إيران..
ولو مصر رفعت عينها أكثر هتشوف لسه 300 مليون عربي تانيين..هتشوف الجزائر اللي ممكن تبقى خزان طاقة لمصر، والعراق اللي مفيش شيء يفرقنا عنها..هتشوف موريتانيا اللي محدش فينا يعرفها، واللي ممكن تكون بوابتتا لغرب إفريقيا..هنعرف أكثر إن الصومال بوابة حماية البحر الأحمر، وإن أمن قناة السويس من أمن جيبوتي..هنشوف عالم عربي كبير لا يشكل الخلايجة أكثر من ثمن سكانه..لكنه فعلا رئتنا وشرايينا..مش أصحاب القواعد الأميركية الخانعين اللي لو قامت في يوم حرب عليك هيكونوا هم أول المساهمين..
أهالينا في ليبيا مينفعش الواحد يقول لهم شكرا..لأنك وقتها هتكون بتشكر في نفسك..لكن اللي ينفع تقوله فعلا إن المصري شبه ناسه..حتى لو كان بيننا مشاكل..لكن وقت الجد مش بنلاقي غيرهم جنبنا..مياهنا من السودان، ونفطنا من ليبيا، وعزتنا من القطاع، ومآذننا في وهران، وحصوننا في صنعاء..وأمانهم جميعاً مصر..وليتنا نعلم قدرنا..ونعلم أن العالم أوسع من بئر نفط خليجي مدنس بالخيانة.
اترك تعليقاً