كتبت سحر مهني
أولاً: لغز “الدقيق”.. ليه الحاجة بتنشف أو تطرد السمنة؟
مش أي دقيق “فاخر” ينفع للنواعم! السر في كلمة “العِرق”.
أفضل أنواع الدقيق: دوري على النوع المكتوب عليه “للكحك والبسكويت” صراحةً. لو ملقتيش، هاتي دقيق “استخراج 72%” ويكون مكتوب عليه “منخفض البروتين” (أقل من 10%).
ليه؟ لأن الدقيق اللي عِرقه قوي (بتاع البيتزا والمعجنات) هيحول الكحك لقرص ناشفة، والبيتيفور هيفرش منك!
ثانياً: معركة “السمنة والزبدة”.. نستخدم إيه؟
الكحك: ملوش غير “السمنة”. الزبدة فيها مية (لبن) وهتخلي الكحك ينشف ويعفن بسرعة. السمنة البلدي الجاموسي (البيضا) أو البقري (الصفرا) هي الأصل.
البسكويت والبيتيفور والغريبة: هنا بقى مملكة “الزبدة”. الزبدة هي اللي بتدي القرمشة والهشاشة.
أفضل أنواع الزبدة: (نيوزيلاندي) هي التوب، وبعدها الأنواع المصرية المحترمة زي (فيرن أو كريستال) بس تكون “غير مملحة”.
تركة السمنة: لو هتعملي كحك “على الساخن” لازم تقدحي السمنة كويس. لو “على البارد” لازم السمنة تكون خارجة من التلاجة (مرملة) عشان تديكي قوام كريمي.
ثالثاً: أسرار “الحشوات” اللي مبتنشفش
الملبن: اعجنيه بمعلقة سمنة “باردة” وروح موز أو فانيليا. ممنوع النار نهائياً لأنها عدو الملبن وبتحجره.
العجوة: شوحيها مع معلقة سمنة ونقطة مية صغيرة لحد ما تطرى، وكوريها وهي دافية.
القفل المظبوط: اتأكدي إن العجينة مغطية الحشوة تماماً، لو “نسمة” نار لمست الحشوة جوه الفرن هتنشف فوراً.
رابعاً: نصايح ذهبية قبل ما تبدأي:
الميزان هو الحل: بلاش شغل “بالكوباية” في النواعم.. الميزان بالجرام هو اللي بيطلع الحاجه زي “لابوار” و”تسيباس”.
اختبار الفرن: اخبزي 3 قطع بس في الأول وشوفي النتيجة (فرشت؟ نشفت؟) قبل ما تشكلي الكمية كلها.
التبريد: البيتيفور والبسكويت بالذات بيحبوا العجينة تفضل ساقعة.. لو الجو حر، دخلي العجينة التلاجة بين كل “صاج” والتاني.
السكر البودرة: لازم يكون “منخول” وناعم جداً عشان ميبانش حبيبات في العجينة.
اترك تعليقاً