بقلم: د بسمه إبراهيم
منذ عامين
دخلت كشف عند دكتور أورام لاول مره في حياتي
بتحويل من طبيبة نسا كانت مهتمه جدا و متابعاني لحد ماتأكدت اني روحت
رايحه في كامل أناقتي ..الابتسامة مفارقتش وشي
معايا كتاب بقرا فيه وانا منتظره معادي
أول ما الدكتور كشف … قعد على مكتبه
وبدأ ب:
“للأسف انتي عندك كانسر، وغالبا في مرحلة متأخره ”
وبدأ يتكلم … يتكلم كتير أوي
عن رحلة العلاج … مراحلها الطويله …التكلفه…الالتزامات
والسيناريوهات السيئه المحتمله
وهو بيتكلم وأنا بصاله وشكلي مهتم ومبتسمه ابتسامه بلهاء
وكنت فاكرة إن ده تصرف ناضج بس ده طلع جريمه ف حق نفسي .. وهفهمك ليه
طبعا انا مكنتش مهتمه لكلامه ولا فاهمه منه ولا كلمه اصلا
كنت في ملكوت تاني خالص
كنت عايزة أقاطعه وأقوله:
انت بتقول إيه؟ هو في كانسر بيتشخص ف كشف ؟ وبعدين
أنا لسه بادئة كورس مع بيزنس كوتش
وعملت بلان
وهبدأ الأسبوع الجاي أطبقها
وأطور شغلي في الكوتشنج!
إنت بتقول ايييه؟
الغريب إن استرساله كان مستفز جداا بالنسبة لي
تفاصيل كتير… أكتر من اللازم
وبعدين فجأة ادرك تقريبا انه بيعك ف وقف وقالي :
” على فكره أنا مشوفتش مريضة زيك في حياتي
إنتي قويه و مبتسمه و متماسكه
وده اللي شجعني إني ماخبيش عليكي أي حاجه”
وهنا
نورت أول لمبه
قاعده رقم 1
مش هتظاهر بالقوة ولا هرسم ابتسامة بلهاء وأنا في عز ضعفي ومحتاجة لأبسط أشكال الدعم
القوة الحقيقية
مش إنك تبيني إنك كويسه طول الوقت
القوة الحقيقيه إنك تعترفي إن في اوقات بتبقي محتاجة حد يشيل معاكي …. مش ينبهر بيكي وبقوتك
ومن اليوم ده.. بطلت ألبس أقنعة في مواقف واحداث المفروض أكون فيها إنسانة … مش نموذج
وده كان ليه تأثير كبير في سهولة ويسر الأيام الثقال
– بسمة
اترك تعليقاً