يمنى أبو السباع
الاديبة الاعلامية والشاعرة السكرتير العام لجمعية النسر
الادبية
لو بس يعني ..
كان الطريق اوسم شوية
انا كنت هركض
م المسافات البعيدة
لحد قلبك
انا كنت ههرب م الحقيقة
واحب كدبك
انا كنت هبقى بجوز جناح
واطرد شياطين الجراح
وافترض حسن الكلام
وامدح في سيرتك
لو بس يعني ..
شوك الطريق ارحم بهنة
انا كنت هسبق اي فُرقة
واقولك إفضل
انا كنت ابطل ابقى شكاية
وعفية ..
انا هبقى غية
واسيبك تنطلق ويا الحمام
م الصبح بدري
و تعود مع الكيف والهوى
ف المغربية
لو بس يعني ..
كان الطريق ادفى بچاكتة
انا كنت همشي بحتة صيفي
مزهزهة
ومخفش من برد الليالي
انا كنت اجيلك مُرزقة
انا كنت هاجي لحد عندك
واطرد البرد اللي حاوط
خطوتك
وهقول حرام دة حرارتة عالية
لو بس يعني ..
كان الطريق بجنينة واسعة
انا كنت هسعى احب وصفك
انك اجمل من الورود
وإن البرود اللي ف كلامك
مش دليل انك بايعني
او حتى يعني
إن الجنينة برغم سكنها الكتار
من وسعها
حضنك براح
بعرف اخبي وانتشي
جواه واسرح..
بس نفسي يكون لي وحدي
لو بس يعني ..
كان الطريق لابس عريس
انا كنت ازف النعل ف الخطوات
واجيلك لابسة طرحة
انا كنت هبقى البسمة ف العمدان
واجيلك نترسم على وش فرحة
انا كنت هبقى عروستك انت مش
الطريق ..
انا كنت هخلِف كل
قوانين الأسى
وهقولك ابقى
لو بس يعني ..
شعر
اترك تعليقاً